พิธีการรื้อถอนสิ่งปลูกสร้างในวัด

สิทธิการิยะ จักกล่าวสิ่งปลูกสร้างไว้ภายในวัดและอารามก่อนแล ผู้มีปัญญาเปิงรู้ดังนี้เต๊อะฯสิ่งก่อสร้างใดได้สร้างถวายตานแล้วถือว่าเป็นสมบัติของศาสนา สิ่งก่อสร้างนั้นได้จื่อว่าเป็นของสงฆ์ดูแลรักษาไว้พุทธศาสนาต่อไป บ่ว่าสิ่งก่อสร้างนั้นจะเป็นกุฏิ วิหาร ศาลา กำแพง และอื่นๆ ก็ดีปุคละผู้มีผญาปัญญาอันมี ใจ๋เป๋นบุญเป๋นกุศลนั้นรู้ผิดรู้ชอบย่อมบ่เข้าไปรื้อถอน ม้างเต โดยตี๋พระสงฆ์องค์เจ้าบ่ได้อนุญาตเตื่อแล เมื่อจักรื้อถอนสิ่งใดอันเป็นของสงฆ์นั้นดังอั้น ต่านว่าเปิงกวรขออนุญาตจากพระสงฆ์เจ้าเสียก่อน แล้วหื้อได้นิมนต์พระสงฆ์มารับรู้และอนุญาตตั้งแต่ 5 รูปขึ้นไปแลฯ

สิ่งของที่ศรัทธาจักหาไว้มีดังนี้คือ

ขนทรายมาไว้ 4 แจ่งของสิ่งที่อันจักรื้อถอนนั้นแจ่งละ 1 ก๋อง ขันเข้า 4 ขันนำมาตั้งไว้หน้าพระสงฆ์ที่นิมนต์มา หาดินกี่หรืออิฐ ไม้ ปูน หรือสิ่งใดก็ดีที่จักมาถวายตานแทนสิ่งก่อสร้างอันเก่า เครื่องไทยตานอันที่จักถวายตานแก่พระสงฆ์ที่เราได้นิมนต์มานั้น

ในเมื่อพระสงฆ์มาพร้อมแล้วให้ศรัทธาไหว้พระรับศีลแล้ว พระสงฆ์เจริญพระพุทธมนต์จบแล้ว อาจารย์วัดกล่าวคำขออนุญาตจากพระสงฆ์อันที่จักรื้อถอนสิ่งปลูกสร้างนั้น ให้อาจารย์กล่าวนำแล้วให้ศรัทธาทั้งหลายว่าตาม ซึ่งคำกล่าวมีดังนี้

สาธุ สาธุ โอก๋าสะ ภันเต๋ สังโฆ ข้าแด่พระสงฆ์ผู้เจริญบัดนี้ศรัทธาข้าพเจ้าทั้งหลาย ตังปายในตัง

ปายนอก ปายในหมายมี เจ้าอาวาสของวัด นี้เป๋นเก๋าประธานหนปายนอก นั้นหมายมีศรัทธาเฒ่าแก่ญิงจายตังหลายจุผู้จุคน ก็มาเล็งหันว่า (จักรื้อถอนสิ่งใดหื้อว่าสิ่งนั้น) เป็นของสงฆ์อันสมณะมูลศรัทธาตังหลายได้สร้างถวายเป๋นตานไว้กับศาสนามาเมินนานแล้วบัดนี้ หลังนี้ก็เป๋นอันหลุเก่าค่ำจราบ่เป๋นถาวรมั่นคงได้ต่อไปแล้ว แม้นว่าจักใจ๋ป่ำเป็งสมณะกิจกิ๋นตานเป๋นก๋ารลำบาก และบ่เป๋นตี่ป๊นภัยแก่ผู้อาศัย ด้วยเหตุนี้ศรัทธาข้าพเจ้าตังหลาย ตังปายใน ตังปายนอก ก็ได้ปรึกษาหารือกั๋นแล้ว ก็ได้มีเอกฉันทะหันว่าสมควรจักรื้อเตยัง หลังนี้แล้วก็จักปากั๋นสร้างก่อขึ้นใหม่หื้อดียิ่งกว่าของเก่า แต่ว่าบ่อาจจักรื้อเตได้ด้วยเหตุว่ายังบ่ได้รับ อนุญาตเตื่อนั้นแล

ด้วยเหตุนี้จึงได้นิมนต์พระสงฆ์องค์เจ้าตังหลายมานี้ก็เพื่อว่าจักอนุญาตขาดปล๋งจากพระสงฆ์ ในเมื่อพระสงฆันว่ายังบ่กวรจักรื้อเตเตื่อก็ดี บ่อนุญาตขาดปล๋งเตื่อก็ดีดั่งอั่น ศรัทธาข้าพเจ้าตังหลายก็จักปากั๋นหยุดยั้งบ่รื้อบ่เตเตื่อแล ในเมื่อพระสงฆ์หันสมกวรดีม้างดีเต แล้วสร้างขึ้นใหม่ดั่งอันข้าพเจ้าตังหลายจิ่งจักรื้อแตแล้วจะสร้างขึ้นใหม่ต่อไป พระวงฆ์องค์เจ้าตังหลายหันเป๋นสันใดดั่งอั้น ก็ขอได้อปโลกน์และปรึกษาหารือกั๋นต๋ามสมกวรแก่สภาวะแด่เต๊อะฯ พระสงฆ์ที่เป๋นเจ้าอาวาสหรือตัวแทนกล่าวคำอโลกน์ว่า สุณาตุ เม ภันเต๋ สังโฆ ข้าแด่พระสงฆ์ผู้เจริญ บัดนี้สมณะสรัทธาและมูลศรัทธาของวัด นี้ก็ได้กล่าวกำขออนุญาตรื้อถอน หลังนี้ต่อพระสงฆ์แล้ว

บัดนี้ข้าพเจ้าก็หวลรู้ต๋ามดั่งกำตี่ศรัทธาตังหลายกล่าวมาและโดยส่วนตั๋วแห่งข้าพเจ้าแล้วยังบ่อาจจักอนุญาตหื้อรื้อหื้อเตได้ก็ด้วยเหยุว่า หลังนี้เป็นสมบัติของพระสงฆ์จิ่งจ๋ำเป๋นจักต้องปุจฉาถามยังพระสงฆ์หลายรูปหลายต๋นเสียก่อน ถ้าหากว่าพระสงฆ์รูปใดหันว่าบ่สมกวรหื้อรื้อหื้อเตก็ดี ก็จุ่งจักกล่าวขึ้นตี่ในต่ามกล๋างสงฆ์นี้เต๊อะ และถ้าหากว่าหันสมควรหื้อรื้อหื้อเตแล้วก็ขอจุ่งได้หื้อสัททะเสียงสัญญาสาธุก๋ารขึ้นพร้อมกั๋นแด่เต๊อะ(แล้วพระสงฆ์ในตี่จุมนุมก็จักกล่าวขึ้นพร้อมกั๋นว่า สาธุ สาธุ สาธุ ดีแล) เสร็จแล้วศรัทธษตังหลายถวายไตยตานแก่พระสงฆ์แล้วพระสงฆ์อนุโมทนา เป็นเสร็จพิธีฯ

(จากปั๊บสาโบราณ) (วัดต้นโชค บ้านร้อง หมู่ 8 ต.ยุหว่า อ. สันป่าตอง จ.เชียงใหม่ 50120)